လေကြောင်းနှောက်ယှက်မှု တရုတ်ကို အမေရိကန် ကန့်ကွက်

နိုင်ငံတကာ လေပိုင်နက်ထဲ ပျံသန်းနေတဲ့ အမေရိကန်ကင်းလှည့်လေယာဉ်ကို တရုတ်က ချဉ်းကပ်နှောက်ယှက်ပေးတဲ့အပေါ် အမေရိကန်က ကန့်ကွက် ဝေဖန်လိုက်ပါတယ်။

သတ်မှတ်လမ်းကြောင်းအတိုင်း အမေရိကန်ရေ တပ်ရဲ့ P-8 Poseidon ကင်းလှည့်လေယာဉ် ပျံသန်းနေစဉ် တရုတ် Su-27 က ကြားဖြတ်နှောင့် ယှက်နေတာဟာ ပရော်ဖက်ရှင်နယ်မပီသဘဲ အန္တရာယ်များ တာကြောင့် ကန်ကွက်တာဖြစ်တယ် လို့ ပင်တဂွန်စစ်ဌာနချုပ် ပြောရေးဆိုခွင့်ရ ဂျွန်ကာဘီက သတင်းထောက်တွေကို ပြောပါတယ်။

လေယာဉ်အမှုထမ်းတွေရဲ့လုံခြုံရေး ထိပါးလာနိုင်တဲ့ တရုတ်ရဲ့လုပ်ရပ်အပေါ် ကန့်ကွက်တဲ့အကြာင်း တရုတ်ကို အသိပေးထားပြီလို့ ကာဘီက ဆိုပါတယ်။

အမေရိကန်လေယာဉ်နဲ့ (၁၀) မီတာအနီး သုံးကြိမ်ခန့် ချဉ်းကပ်ခဲ့တဲ့ တရုတ် Su-27 တိုက်လေယာဉ် ဓာတ်ပုံတွေကိုလည်း ပင်တဂွန်က သတင်းထုတ်ပြန်ပြသခဲ့ပါတယ်။

၂၀၀၁ ခုနှစ်တုန်းကလည်း ပစိဖိတ်ရေပြင်အထက် ကောင်းကင်ယံပေါ်မှာ အမေရိကန်လေယာဉ်နဲ့ ဝင်တိုက်မိခဲ့တာကြောင့် တရုတ်တိုက်လေယာဉ်မှူး သေဆုံးခဲ့ပါတယ်။