ရုရှားကျူးကျော်မှု ကာကွယ်ဖို့ ယူကရိန်းအစိုးရ တပ်လှန့်

9:26 AM | : သတင်း, နိုင်ငံတကာ | :Unknown

ယူကရိန်းနိုင်ငံနယ်စပ်မှာ အင်အားတိုးမြှင့်ချထားတဲ့ ရုရှားတပ်ဖွဲ့တွေ ကျူးကျော်သိမ်းပိုက်မယ့်အရေးက ကာကွယ်ဖို့အတွက် သူတို့တပ်ဖွဲ့တွေကို အသင့် ပြင် ဆင်ထားကြောင်း ယူကရိန်းယာယီ သမ္မတက ပြော လိုက်ပါတယ်။
ရုရှားအနေနဲ့ ယူကရိန်းပြည်မကြီးနဲ့ စစ်ဖြစ်ဖို့ တကယ့်ခြိမ်းခြောက်တဲ့ အနေအထားမှာ ရှိနေတယ် လို့ ယူကရိန်းယာယီသမ္မတ Oleksandr Turchynov က Kyiv မြို့မှာ ဒီကနေ့ပြုလုပ်တဲ့ ၀န်ကြီးအဖွဲ့ အစည်းဝေး အတွင်း ပြောကြားလိုက်တာပါ။
ယူကရိန်း-ရုရှားနယ်စပ်နားက ယူကရိန်းအစိုးရ အဆောက်အဦးတွေကို ရုရှားလိုလားသူ ခွဲထွက်ရေးဝါဒီ ရာပေါင်းများစွာက ဒီကနေ့ အတင်း ၀င်ပြီးတော့ သိမ်းပိုက်လိုက်အပြီးမှာ ယာယီသမ္မတက အခုလို ပြောဆို လိုက်တာလည်း ဖြစ်ပါတယ်။

Luhansk မြို့မှာ ရှေ့နေရုံးကို သိမ်းပိုက်ပြီး ရဲစခန်းတခုကို သံတုတ်တွေ၊ မောင်းပြန်သေနတ်တွေနဲ့ တိုက်ခိုက် ခဲ့ကြပါတယ်။
ရဲတပ်ဖွဲ့က မခုခံခဲ့ဘူးလို့ ဒေသဆိုင်ရာ အာဏာပိုင်တွေက ပြောသလို လူဦးရေ ၄ သိန်းခွဲရှိတဲ့မြို့ရဲ့ အစိုးရ ရုံးချုပ်ပေါ်မှာ ခွဲထွက်ရေးဝါဒီတွေရဲ့အလံကို သေနတ်သမားတွေက လွှင့်ထူခဲ့တယ်လို့ မျက်မြင်တွေ့သူတွေ က ပြောပါတယ်။
အခု သိမ်းပိုက်မှုဟာ အရှေ့ပိုင်းက ဒုတိယမြောက် ပြည်နယ်မြို့တော်ကို ရုရှားလိုလားတဲ့ သူပုန်တွေ ထိန်းချုပ် လိုက်တဲ့ပုံ ရပါတယ်။

Donetsk မြို့ကို တနင်္လာနေ့မှာ ခွဲထွက်ရေးဝါဒီတွေက သိမ်းပိုက်ခဲ့ပြီး ယူကရိန်းကနေ ခွဲထွက်မထွက် မေလ ၁၁ ရက်နေ့မှာ လူထုဆန္ဒခံယူပွဲ လုပ်မယ်လို့ ကြေညာထားတာပါ။

ပြီးခဲ့တဲ့လက အလားတူ လူထုဆန္ဒခံယူပွဲကနေ Crimea ကျွန်းဆွယ်ကို ရုရှားပိုင်နက်ထဲ ထည့်သွင်းခဲ့ပါတယ်။