ရုရှားလိုလားသူသိမ်းပိုက်ထားတဲ့ ယူကရိန်းအစိုးရ အဆောက်အဦးတွေ ကို ဖြစ်တဲ့နည်းနဲ့ ဖြေရှင်းမည်

9:00 AM | : သတင်း, နိုင်ငံတကာ | :KayanTimes

ယူကရိန်းအရှေ့ပိုင်းမှာ ရုရှားလိုလားသူတွေ သိမ်း ပိုက်ထားတဲ့ အစိုးရအဆောက်အဦးတွေကို စေ့စပ်
ဆွေးနွေးမှုတွေနဲ့ပဲဖြစ်ဖြစ် အင်အားသုံးပြီးပဲဖြစ်ဖြစ်
သောကြာနေ့မှာ နောက်ဆုံးထားပြီး ဖြေရှင်းမယ့် အကြောင်း ယူကရိန်းအစိုးရက သတိပေးလိုက် ပါတယ်။

ယူကရိန်းအရှေ့ပိုင်း ရုရှားနယ်စပ်နားက Luhansk နဲ့ Donetsk မြို့က ရှေ့မတိုး နောက်မဆုတ် အခြေအနေနဲ့ ပတ်သက်လို့ ပြည်ထဲရေးဝန်ကြီး Arsen Avakov က ဗုဒ္ဓဟူးနေ့က ပြောဆိုရာမှာတော့ ဆွေးနွေးလိုသူတွေ အတွက် နိုင်ငံရေးအရ အဖြေရှာဖို့ ရည်ရွယ် ထားကြောင်း ပြောဆိုခဲ့တာပါ။

ဒါပေမဲ့လည်း ပဋိပက္ခကို လိုလားနေကြတဲ့ လူနည်းစုတွေအတွက်တော့ အင်အားသုံး ဖြေရှင်းတဲ့နည်းနဲ့ ရင်ဆိုင်ရမယ်လို့လည်း သတိပေးခဲ့ပါတယ်။

ယူကရိန်းနိုင်ငံက အစိုးရပိုင် အဆောက်အဦးတွေကို စနစ်တကျ၊ ပစ်မှတ်ထားပြီး အကွက်ချ သိမ်းပိုက် ခဲ့တဲ့အကြောင်း အမေရိကန် ကွန်ဂရက်လွှတ်တော်ရဲ့ ကြားနာမှုတခုမှာ အမေရိကန် အကြီးတန်းသံတမန် Victoria Nuland က ပြောဆိုလိုက်တဲ့ ဗုဒ္ဓဟူးနေ့မှာပဲ ယူကရိန်းအစိုးရရဲ့ သတိပေးချက် ထွက်ပေါ်လာ တာပါ။

သိမ်းပိုက်မှုတွေမှာ ရုရှားနိုင်ငံက ပတ်သက်နေတဲ့ အထောက်အထားတွေကိုလည်း အကြီးအကျယ် တွေ့ခဲ့ ရတဲ့အကြောင်း ပြောဆိုခဲ့သလို၊ ရန်လိုတဲ့ လုပ်ရပ်တွေကို ဆက်လုပ်နေမယ်ဆိုရင် နောက်ဆက်တွဲ အကျိုးဆက်တွေနဲ့ ရင်ဆိုင်ရလိမ့်မယ်လို့လည်း အမေရိကန် သံတမန် Nuland က သတိပေးခဲ့ပါတယ်။

ယူကရိန်းအရေးနဲ့ ပတ်သက်လို့ အမေရိကန်၊ ဥရောပသမဂ္ဂ (EU)၊ ရုရှားနဲ့ ယူကရိန်းတို့ ရှေ့သီတင်းပတ် ထဲ တွေ့ဆုံဆွေးနွေးမှုကနေ ကြီးကြီးမားမား ရလဒ်တွေ ထွက်ပေါ်လာမယ်လို့ အမေရိကန် သံတမန်တွေ
မျှော်လင့်မထားတဲ့ အကြောင်းလည်း လွှတ်တော်အမတ်တွေကို ပြောခဲ့တာပါ။